Andrey Karlov o‘ldirilgan ko‘rgazmalar zaliga uning nomi berildi

Anqaradagi Zamonaviy san'at markazidagi ko‘rgazmalar zaliga Rossiyaning Turkiyadagi sobiq elchisi Andrey Karlovning nomi berildi. Andrey Karlov 2016 yil 19 dekabrda ushbu zalda terrorchi qurboniga aylangan edi, deb xabar qilmoqda Anadolu agentligi.

Chanqoya tumani rahbari Alper Tashdelenning bayonot berishicha, rossiyalik diplomatning o‘ldirilishi Turkiya va Rossiya xalqlarining chuqur qayg‘usiga sabab bo‘lgan.

"Terrorizm – bu butun insoniyatga qarshi jinoyatdir. Biz dini va millati yo‘q terrorchilarni qoralaymiz. Bu zal Karlov xotirasini abadiy saqlaydi", - degan Tashdelen.

Rossiyaning Turkiyadagi elchisi Andrey Karlov Anqaradagi ko‘rgazmada nutq so‘zlayotgan vaqtda otib o‘ldirilgan edi. RF tashqi ishlar vazirligi voqeani terakt deb baholagandi. Karlovga o‘limidan so‘ng, Rossiya qahramoni unvoni berilgandi.