Qozog‘istonda prezident ma'muriyati rahbarining sobiq o‘rinbosari hibsga olindi

Qozog‘istonda mamlakat prezidenti ma'muriyati rahbarining sobiq o‘rinbosari Baglan Mayliboyev qo‘lga olindi. U davlat sirlarini oshkor etishda gumon qilinmoqda. Bu haqda Tengrinews respublika milliy xavfsizlik qo‘mitasiga asosan xabar berdi.

Ta'kidlanishicha, Mayliboyev bilan birga prezident ma'muriyatining yana bir sobiq xizmatchisi – Nikolay Galixin ham hibsga olindi. U davlat rahbarining saytida ichki siyosat bo‘limi mudirining o‘rinbosari sifatida ko‘rsatilgan.

Mayliboyev va Galixin 12 yanvar kuni qo‘lga olindi. Ular davlat sirlarini noqonuniy yig‘ish, tarqatish va oshkor etishda gumon qilinmoqda.

«Gumonlanuvchilarning uylarida tintuv o‘tkazildi, dalil-isbotlar olindi. Tergov davom etmoqda, uning natijalari haqida keyinroq batafsil ma'lumot beriladi», - deyiladi MXQ xabarida.

Ma'lumot uchun, Mayliboyev Qozog‘iston prezidenti ma'muriyati rahbarining o‘rinbosari lavozimidan 2017 yilning 12 yanvar kuni ozod etildi. U bu vazifada 2011 yilning 11 oktabridan boshlab ishlab kelgan.