Telegram Qozog‘istonda ofisini ochdi

Telegram rasman Astana Hub a’zosiga aylandi, Qozog‘istonda o‘z ofisini ochdi va AIem.Ai markazida sun’iy intellekt laboratoriyalarini ishga tushirdi.

Foto: akorda.kz

Qozog‘iston prezidenti Qosim-Jo‘mart To‘qayev Digital Bridge 2025 xalqaro forumi doirasida Telegram messenjeri asoschisi Pavel Durov bilan uchrashdi.

Oqo‘rda xabariga ko‘ra, suhbat chog‘ida ta’lim, sun’iy intellekt va kiberxavfsizlik sohalaridagi hamkorlik masalalari muhokama qilindi. Prezident messenjerning mamlakat raqamli kun tartibini rivojlantirishni qo‘llab-quvvatlash borasidagi faoliyatini yuqori baholadi.

Qayd qilinishicha, kompaniya rasman Astana Hub a’zosiga aylandi, Qozog‘istonda o‘z ofisini ochdi va AIem.Ai markazida sun’iy intellekt laboratoriyalarini ishga tushirdi.

Ta’kidlanishicha, Pavel Durov Qozog‘iston rahbariga sun’iy intellekt sohasida qo‘shma loyihalarni amalga oshirish istiqbollari haqida so‘zlab berdi.