AQShda navbatdagi fitna: bezorilar qabristondagi qabr toshlarni buzib tashlashdi 

AQShning Pensilvaniya shtatining Filadelfiya shahridagi yahudiylar qabristoniga bezorilar hujum uyushtirishgan. Bu yerdagi qabrtoshlar ag‘darilgan yoki zararlangani aniqlangan, deb xabar qilmoqda Associated Press agentligi. 

Yakshanba, 26 fevralda qabristonga kelgan erkak politsiyaga qo‘ng‘iroq qilib, shunday achinarli holatga duch kelgani haqida xabar qilgan. 

"Biz atrofni ko‘zdan kechirganimizda yana yuzga yaqin qabr toshlarning ag‘darilganiga guvoh bo‘ldik", — deya ma'lum qilgan politsiya vakili. Ayni vaqtda, ABC6 telekanali 500ta qabrtoshga zarar yetkazilgani haqida xabar qilgan. Huquq-tartibot idoralari ushbu jinoyatni vahshiylik holatlari deb hisoblamoqda. 

Agentlikning qayd etishicha, bu so‘nggi bir hafta mobaynida sodir etilayotgan ikkinchi shu kabi jinoyatdir. Avvalroq, bezorilar Missuri shtati qabristonidagi qabr toshlarini buzib tashlashgan edi.