Buyuk Britaniyadagi saylovlarning yakuniy natijalari e'lon qilindi

Buyuk Britaniyada o‘tgan muddatdan avval parlament saylovlari bo‘yicha barcha saylov uchastkalaridan olingan ma'lumotlar hisob-kitob qilingandan keyin britaniyalik konservatorlar 318 ta, leyboristlar – 262 ta, Shotlandiya milliy partiyasi – 35 ta, Liberal-demokratik partiya – 12 ta, Demokratik yunionistik partiya – 10 ta, Uels partiyasi – 3 ta va "Yashillar" partiyasi bir dona o‘rin olganlari ma'lum bo‘ldi.

Saylov natijalari bo‘yicha oxirgi bo‘lib Londondagi Kensington okrugi hisobot berdi. Bu yerda Konservatorlar partiyasi va Leyboristik partiya nomzodlari o‘rtasidagi farq shunchalik kichik bo‘lganki, ovozlarni bir necha marta qayta sanab chiqishga to‘g‘ri kelgan.

Birorta partiya mandatlarning yarmidan ko‘pini egallay olmasa, "muallaq parlament" vaziyati va koalitsiyalar tashkil etish zarurati vujudga keladi. Konservatorlar yetakchisi, Buyuk Britaniya bosh vaziri Tereza Mey Shimoliy Irlandiyaning Demokratik yunionistik partiyasi (DUP) bilan hamkorlik qilish istagini bildirdi, biroq u qanday shaklda amalga oshishiga aniqlik kiritmadi.

Avvalroq DUP va konservatorlar o‘rtasida rasman koalitsiya bo‘lmasligi ma'lum qilingan, biroq DUP barcha kelisha olsa, unda tori hukumatini qo‘llab-quvvatlashga majbur bo‘ladi.