AQSh mudofaa vazirligi mamlakat hududidagi istalgan dronni urib tushirishga ruxsat berdi, deb xabar bermoqda Reuters axborot agentligi. Vazirlik xabarida aytilishicha, AQShdagi 130 ta harbiy baza "parvozlar xavfsizligiga xavf solishi yoki boshqa biror xavf tug‘dirishi mumkin bo‘lgan" istalgan dronni urib tushirish huquqini olgan.
Pentagon matbuot kotibi Jyeff Devisning jurnalistlarga aytishicha, buyruqqa binoan ham xususiy, ham tijoriy dronlar urib tushirilishi mumkin.
Uning ta'kidlashicha, dronlar sonining oshishi ularning fuqarolar xavfsizligiga tahdid qilishi borasida xavotirlar oshishiga olib keldi.
Aprelda dronlarning AQSh bazalari ustidan parvozi taqiqlab qo‘yilgandi.
AQSh Federal aviatsiya ma'muriyati ma'lumotlariga ko‘ra, 2016 yil oxirida mamlakatda 42 mingtaga yaqin dron bo‘lgan. Taxmin qilinishicha, 5 yildan keyin bu raqam 1,6 mln gacha yetadi.
