Rossiya TIV rahbari BAA, Kuvayt va Qatar yetakchilari bilan Fors ko‘rfazi inqirozini muhokama qiladi

Rossiya tashqi ishlar vaziri Sergey Lavrov 27-30 avgust kunlari Birlashgan Arab Amirliklari, Kuvayt va Qatarga boradi. Bu haqda Rossiya TIV rasmiy vakili Mariya Zaxarova Moskvadagi brifingda ma'lum qilgan.

Vazir ushbu davlatlar rahbarlari va birinchi shaxslari bilan uchrashishi rejalashtirilgan, dedi Zaxarova.

Uning so‘zlariga ko‘ra, tashrif davomida Fors ko‘rfazidagi inqirozga yechim topish masalasiga katta e'tibor qaratiladi.

TIV vakilining eslatishicha, Rossiya Qatar bilan bog‘liq mojaroda barchaga birdek ma'qul bo‘ladigan yechim topish tarafdori.

Shuningdek, Rossiya diplomatiyasi rahbari BAA, Kuvayt hamda Qatar rahbarlari va birinchi shaxslari bilan Suriya muammosini ham muhokama etish niyatida, dedi Zaxarova.

Avvalroq Qatar Rossiya qurollarini sinovdan o‘tkazayotgani xabar berilgandi.