Ispaniya futbol federatsiyasi tashkilot prezidentini iste'foga chiqishga chaqirdi

Ispaniya qirollik futbol federatsiyasi tashkilot prezidenti Anxel Mariya Vilyarni iste'foga chiqishga chaqirmoqda, deb xabar berdi «R-Sport».

Korrupsiyada gumonlanayotgan Vilyar, futbol faoliyatidan chetlashtirilgandi.

«Bugun o‘z qarorgohida yig‘ilgan RFEF direktorlar kengashi federatsiya va uning organlari normal holatda ishlayotganini tasdiqladi, Xuan Luis Larrea o‘z lavozimida qo‘llab-quvvatlandi.

Biroq, direktorlar kengashiga Vilyar bilan uchrashuvda unga iste'foga chiqish haqida murojaat topshirilgani va tezroq javob qaytarish haqida iltimos yuborilgani haqida ma'lumot berildi. Bu yangi prezidentlik saylovlarini o‘tkazishga imkoniyat beradi», - deyiladi RFEF rasmiy saytidagi bayonotda.

Vilyar 2017 yilning 18 iyul kuni o‘z o‘g‘li Gorka, shuningdek, RFEF vitse-prezidenti, Tenerife futbol federatsiyasi rahbari Xuan Padron va mintaqaviy tashkilot kotibi Ramon Ernandes bilan birgalikda korrupsiyaga qarshi reyd vaqtida qo‘lga olingandi.