Xitoyda kuchli yomg‘irlar oqibatida 8 kishi halok bo‘ldi, 6,7 ming inson evakuatsiya qilindi

Xitoy janubi-g‘arbiy va markaziy tumanlarida yuz bergan kuchli yomg‘irlar hamda suv toshqinlari oqibatida 8 kishi halok bo‘ldi, yetti nafari bedarak yo‘qoldi, yana 6,7 ming inson xavfsiz joyga evakuatsiya qilindi. Bu haqda XXR Fuqarolik ma'muriyati vazirligi bayonotida aytiladi.

Noqulay ob-havo Xenan, Xubey, Sichuan, Guychjou, Yunnan, Shensi viloyatlari va markaziy boshqaruvdagi Chuntsin shahridagi 596 ming kishini qamrab oldi. O‘tgan juma kunidan beri to‘xtamayotgan kuchli yomg‘irlar sellar hamda ko‘chkilar, suv toshqinlariga sabab bo‘lgan, ba'zi tumanlarda esa do‘l kuzatildi.

Tabiiy ofat tufayli yetkazilgan to‘g‘ridan-to‘g‘ri iqtisodiy zarar miqdori taxminan 64,5 mln dollarga baholanmoqda. Hodisalar oqibatida 500dan ortiq uylar vayron bo‘ldi, yana 2,7 mingtasi zararlandi. 27,7 ming gektar yerdagi qishloq xo‘jaligi mahsulotlariga ziyon yetgan.