O‘zbekistonlik taekvondochilar Malayziyada 4ta medalni qo‘lga kiritishdi

Tayekvondo’ning WTF yo‘nalishi bo‘yicha Malayziyaning Kuala-Lumpur shahrida bo‘lib o‘tgan yoshlar o‘rtasidagi 2nd Malaysia Open International Taekwondo Championship 2017 musobaqasida yurtimiz sharafini 8 nafar jajji hamyurtimiz himoya qildi.

53 davlatdan tashrif buyurgan sport ustalari ichida Dadamuxammedov Temurbek (27 kg. vaznda) va Abdullayev Abusufyon (27 kg. vaznda) bronza va kumush medaliga ega bo‘lishgan bo‘lsa, Miryokubov Mirabror (30 kg. vaznda) finalgacha 6 jang o‘tkazib ularning barchasida ishonchli g‘alabaga erishdi. Mirabrorbek finalda indoneziyalik raqibi ustidan ishonchli g‘alaba qozonib, musobaqa davomida ko‘rsatgan jang mahorati yuqori baholandi va musobaqada eng zo‘r texnikaga ega sportchisi deb tan olinib, qo‘shimcha mukofotga ega bo‘ldi.

Shuningdek, 20 kg vaznda ishtirok etgan Jahongirov Javohir barcha raqiblarini mag‘lub etib, oltin medal sohibi bo‘ldi.

Bu kabi yoshlarimiz kelajakda boshqa musobaqalarda ham Yurtimiz sharafini yanada ko‘klarga ko‘taradi, degan umiddamiz.