Rossiyada O‘zbekistonning yana bir fuqarosi halok bo‘ldi

Rossiyaning Svetlogorsk shahrida seshanba, 31 oktabr kuni erkak kishi tomdan yiqilib hayotdan ko‘z yumdi. Hodisa «Viktoriya» supermarketi joylashgan tumanda kunning ikkinchi yarmida yuz bergan. Guvohlarning so‘zlariga ko‘ra, erkak qurilayotgan ma'muriy bino tomini yopish bilan shug‘ullanayotgan bo‘lgan. Bu haqda mahalliy nashrlar yozmoqda.

Rossiya Tergov qo‘mitasining mintaqaviy tergov boshqarmasi rahbari katta yordamchisi Natalya Gatskoning xabar berishicha, voqea joyida tumanlararo bo‘lim tergovchisi ishlamoqda. Huquqni muhofaza qilish idoralari xodimlari halok bo‘lgan erkakning shaxsini aniqlashdi. U O‘zbekistonning 30 yoshli fuqarosi ekani aytilmoqda.

Dastlabki ma'lumotlarga ko‘ra, erkak to‘qqiz metrlik balandlikdan pastga qulagan. Tergovchilar tekshiruv boshlashdi, hodisaning barcha tafsilotlari aniqlanmoqda.