Buyuk Britaniya YeI oldidagi moliyaviy majburiyatni taklif etilgani kabi hal qilmoqchi emas

Buyuk Britaniya hukumati Yevroittifoq oldidagi moliyaviy majburiyatlarini qanday hal etishini YeI Kengashi uchrashuvidan oldin tushuntirib o‘tadi. Bu haqda mamlakat Moliya vaziri Filip Hammond jurnalistlarga xabar bergan.

Yil so‘ngida YeI Kengashi uchrashuvi o‘tkazilishi rejalashtirilgan edi. Shunga qadar o‘z moliyaviy majburiyatlarini Bryussel oldida qay yechimda hal qilishini izohlab beruvchi hujjat Britaniya hukumati tomonidan taqdim etilishi lozim. «Biz barcha imkoniyatlarni ishga solgan holda hujjatlarni o‘z vaqtida tayyorlaymiz», deydi Moliya vaziri BBC muxbiri bilan suhbatda.

Kelgusi 16 oy ichida Buyuk Britaniya Ittifoqni tark etishi uchun rasmiy Bryussel talab qilgan mablag‘ning uchdan birini to‘lashga rozi ekanligini bildirgandi. Mamlakat Bosh vaziri Tereza Mey Shvetsiya o‘tgan sammitdagi nutqida ta'kidlashicha, britaniyaliklar 20 milliard yevro evaziga YeI oldidagi moliyaviy majburiyatini tugatmoqchi.