O‘zbekistonlik ikki marafonchi Andrey Petrov va Marina Xmelevskaya marafon bo‘yicha XVI Osiyo chempionatida ishtirok etishdi va “quruq qo‘l bilan qaytmaydigan” bo‘ldilar. Musobaqa 26 noyabrda Xitoyning Dunguan shahrida bo‘lib o‘tdi.
Hamyurtimiz Andrey Petrovga chempion bo‘lishga bor-yo‘g‘i 3 soniya yetmadi: u aynan shuncha vaqtga musobaqa chempioni hindistonlik Gopi Tonakaludan ortda qoldi. Petrov 2 soat 15 daqiqa 51 soniya vaqt bilan marraga ikkinchi bo‘lib keldi va shaxsiy ko‘rsatkichini 2 daqiqaga yaxshiladi.
Bronza mo‘g‘ulistonlik Byambalev Tsvevenravdanaga nasib qildi.
O‘zbekiston Yengil atletika federatsiyasida ma'lum qilinishicha, Petrov avval ham Osiyo chempionati sovrindori bo‘lgan. 4 yil avval u kumush medalni qo‘lga kiritgandi.
Marina Xmelevskaya esa 2 soat 39 daqiqa vaqt bilan 7-o‘rinni egalladi. Ayollar o‘rtasidagi bahsda shimoliy koreyalik Kim Xe Gyon 2 soat 28 daqiqa vaqt bilan chempion bo‘ldi.
