2017 yilda o‘zbek saytlari 700 ga yaqin xakerlik hujumiga uchradi  

UZ domen hududiga kiruvchi saytlar 2017 yilda 669 marta xakerlik hujumiga uchragan. Bu haqda Axborot va jamoat xavfsizligi markazi ma'lum qildi. 

Ta'kidlanishicha, 592 ta holatda markaz tomondan hujumlarning oqibatlari va sabablarini bartaraf etish bo‘yicha tegishli choralar ko‘rilgan.

Xakerlik hujumlarining aksariyati kontentni noqonuniy yuklash (322 ta holat) va saytlarning bosh sahifasini o‘zgartirishga urinishlar (345 ta holat) bilan bog‘liq bo‘lgan. Markaz tomondan fishing kontentini joylashtirishga 2 ta urinish qayd qilingan.

Bosh sahifalarni o‘zgartirish va kontentni noqonuniy yuklash holatlarining ko‘pligi xakerlar uchun birinchi navbatda saytlarni yomonotliq qilish va ularga buzib kirilganining isbotini qoldirish muhim ekanligini ko‘rsatadi. 

Ma'lum qilinishicha, Wordpress va Jumla dasturlarida yaratilgan saytlarga eng ko‘p hujum qilingan.

Davlat muassasalari saytlaridan 72tasi hujumga uchragan.