Odessada o‘q-dorilar topildi, ular odamlar gavjum yerlarda qo‘llanilishi kerak bo‘lgan

Ukraina Xavfsizlik xizmati Odessada pasxa bayramlari arafasida o‘tkazilgan tintuvlar davomida o‘q-dorilar va qurollar topilgani haqida ma'lum qildi. Ular odamlar gavjum bo‘ladigan yerlarda provokatsiyalar uyushtirishga mo‘ljallangan bo‘lgan. Bu haqda RIA «Novosti» xabar qilmoqda.

«Huquqni muhofaza qilish organlari xodimlari to‘qqizta tintuv vaqtida Makarov to‘pponchasi, ikkita Valter to‘pponchasi, Mosin miltig‘i, pulemyot-to‘pponcha, karabin, turli kalibrdagi mingdan ortiq patronlar va qo‘lbola o‘q otar qurolni yasash uchun detallarni topishdi. Maxsus xizmatlar tezkor ma'lumotiga ko‘ra, olib qo‘yilgan o‘q-dori va qurollar odamlar gavjum bo‘ladigan yerlarda provokatsiyalarni amalga oshirish maqsadida qo‘llanilishi kerak bo‘lgan», - deya xabar qilishgan UXXdan.

Ta'kidlanishicha, UXX va Milliy politsiya qo‘shma amaliyoti natijalari bo‘yicha jinoiy ish qo‘zg‘atildi.