2018 yilning eng qimmat va eng arzon shaharlari nomi e'lon qilindi

Dunyoning turli shaharlaridagi xorijiy mutaxassislar uchun turmush darajasini o‘rganish bilan shug‘ullanuvchi Mercer tahlil kompaniyasi 2018 yilning eng qimmat shaharlari reytingini taqdim etdi. Mercer ekspatlar uchun turmush darajasi narxiga uy-joy, transport, oziq-ovqat mahsulotlari, maishiy tovarlar bilan bog‘liq xarajatlarni kiritadi.

Reytingda Osiyo megapolislari yetakchilik qilmoqda: birinchi o‘rinni Honkong egalladi, ikkinchi o‘rinda esa Tokio qayd etilgan. Xorijiy mutaxassislar uchun turmush bahosi bo‘yicha yetakchilar uchligiga Yevropadagi Tsyurix shahri ham kiritildi. Ilk o‘ntalikdan Shveytsariyaning yana bir shahri ham o‘rin olgan: Bern to‘qqizinchi o‘rinni egallagan.

Amerika shaharlari o‘rtasida ekspatlar uchun eng qimmat shahar sifatida Nyu-York e'tirof etildi (13-o‘rin), Rossiya shaharlaridan esa - Moskva (17-o‘rin).

Eng qimmat shaharlar top-10 reytingi:

1.   Honkong (Honkong maxsus ma'muriy tumani);

2.   Tokio (Yaponiya);

3.   Tsyurix (Shveytsariya);

4.   Singapur;

5.   Seul (Janubiy Koreya);

6.   Luanda (Angola);

7.   Shanxay (Xitoy);

8.   Ndjamena (Chad);

9.   Pekin (Xitoy);

10.Bern (Shveytsariya).

Ekspatlar uchun eng arzon shahar sifatida Toshkent shahri e'tirof etilgan. Mercer tahlilchilari reyting tuzishda 209 shaharni baholashgan.