Yildirim Group rahbari kompaniyaning O‘zbekistondagi loyihalari haqida gapirib berdi

Turkiya kompaniyasi Toshkent aeroportining «reabilitatsiyasi» bilan shug‘ullanadi. Bu haqda Yildirim Group bosh direktori Robert Yildirim Forbes Kazakhstan’ga bergan intervyusida xabar qildi.

Birinchi loyiha - umumiy quvvati 100 MVt bo‘lgan quyosh va shamol stansiyasining qurilishi.

Kelajakda kompaniya Toshkent viloyatining Qibray tumanida davlat-xususiy sherikchilik asosida 600 MVt quvvatli ko‘mir va gaz elektrostansiyalari qurishni xohlamoqda. Bunga 1,2 mlrd dollar miqdorida to‘g‘ridan-to‘g‘ri investitsiyalarni yo‘naltirish rejalashtirilgan.

Ikkinchi loyiha - Toshkent aeroportini tiklash.

«Aprel oyida men prezident Erdo‘g‘an delegatsiyasi tarkibida O‘zbekistonga tashrif buyurib, ikkita loyihani imzolagan edim. Bizning prezidentga O‘zbekistonga erkin bozor yaratish va o‘sishda yordam berishga va'da qildim», - deya izohladi Yildirim. 

Bundan tashqari, kompaniya kaltsinatsiyalangan soda zavodlariga e'tibor qaratmoqchi. Yildirim Group rahbarining so‘zlariga ko‘ra, ular O‘zbekistonda bor, biroq yomon ishlayapti:

«O‘zbekiston hukumati bilan Markaziy Osiyoda mintaqaviy soda sanoatini yaratish uchun qozog‘istonlik sarmoyadorlar bilan birga birlashish va ularni o‘zimizga olib, qayta tiklash hamda eksport qilish borasida muzokaralar olib bormoqdamiz», - dedi Yildirim.