OAV: Rossiyalik velopoygachi Zabelinskaya musobaqalarda O‘zbekiston nomidan chiqmoqchi

Shosse velopoygasi bo‘yicha Olimpiada o‘yinlarining kumush va ikki marta bronza medallari sovrindori, rossiyalik Olga Zabelinskaya sport fuqaroligini o‘zgartirmoqchi va O‘zbekiston terma jamoasi safida musobaqalarda ishtirok etmoqchi. Bu haqda Rossiya velosiped sporti federatsiyasidagi manbaga tayanib TASS xabar qildi.

2012 yilgi London Olimpiadasida u ikkita bronza medalini qo‘lga kiritgan. Braziliyada o‘tgan navbatdagi Olimpiadada u kumush medalga sazovor bo‘lgan. U keyingi ikkita Olimpiada o‘yinlarida shosse velopoygalarida sovrinli o‘rinlarni egallagan rossiyalik yagona sportchi hisoblanadi.  

«Zabelinskaya boshqa mamlakat nomidan musobaqalarda qatnashishga qaror qildi. U O‘zbekiston sharafini himoya qilishini bildirib ariza yozgan. U nega bunday qildi? Aftidan, yetarlicha qo‘llab-quvvatlashni sezmayapti», - degan agentlik manbasi.

Zabelinskaya o‘tgan galgi o‘yinlarda kumush medalni qo‘lga kiritganidan so‘ng navbatdagi maqsadi 2020 yilgi Olimpiadada oltin medal olish ekanligini aytgandi.