Qozog‘istonning Olmaota viloyati, Rayimbek tumanida yashovchi Nurlan Jartibekov 3 kun, ya'ni 72 soat ichida eni 30 sm, uzunligi 43 metr keladigan sharf to‘qidi.
Qozog‘iston rekordlar kitobiga rekordlarni qayd qilish departamenti direktori Bakitjan Tastulekov Nurlanga Qozog‘iston rekordlar kitobi — KinES-2018’ga 72 soat davomida tinimsiz to‘qigan kishi sifatida kiritilgani haqidagi sertifikatni topshirgan.
“Ota-onamning aytishicha, men 5 yoshimdan boshlab to‘qiyman. Ko‘pchilikka bu erkaklar ishi emasdek tuyulishi mumkin, biroq asosiysi bu menga yoqadi. Men avvalroq ko‘zi yumuq holda to‘qish bo‘yicha Qozog‘iston rekordini o‘rnatgandim, endi esa 3 kun to‘xtovsiz to‘qib, yana bir rekordni o‘rnatdim”, deb aytgan Jartibekov.
Rekordchi avvalroq Braziliyada o‘rnatilgan jahon rekordini yangilagan bo‘lishi ham mumkinligi aytilmoqda. Unga ko‘ra, braziliyalik erkak 64 soat davomida to‘xtovsiz to‘qigan.