YHXB xodimiga pora taklif qilish bilan bog‘liq yana bir holat fosh etildi

Samarqand shahrida 1 sentabr kuni viloyat IIB YHXB xodimi rahbarlariga xabar berib, unda shu yil 31 avgust kuni Bulung‘ur tumanida yashovchi D.A. boshqaruvidagi “Neksiya” rusumli avtomashinani tegishli hujjatlarsiz boshqarganligi uchun YPX inspektorlari tomonidan to‘xtatilib, avtomashina vaqtincha jarima maydoniga qo‘yilganligini va fuqaro D.A. unga avtomashinani jarima maydonidan chiqarib berish evaziga pora taklif qilayotganligini ma'lum qilgan.

Bu haqda O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasi xabar bermoqda.

Mazkur holat yuzasidan 1 sentabr kuni o‘tkazilgan tezkor tadbir natijasida D.A., xodimga xizmat xonasida 300 ming so‘m pulni bergan vaqtida ashyoviy dalillar bilan ushlangan. 

Holat yuzasidan fuqaro D.A.ga nisbatan jinoyat ishi qo‘zg‘atilib, tergov harakatlari olib borilmoqda.