Hindistonda ziyoratchilar avtobusi halokatga uchrashi ko‘plab qurbonlarga olib keldi 

Hindiston janubidagi Telingan shtatida ziyoratchilar ketayotgan avtobus bilan avtohalokat yuz berdi. Avtobusning daraga tushib ketishi oqibatida kamida 32 kishi halok bo‘lgan. Bu haqda Times of India nashri ma'lum qildi. 

Nashr ma'lumotlariga ko‘ra, voqea 11 sentabr ertalab Jagtal okrugida yuz bergan. Ichida 62 yo‘lovchi bo‘lgan avtobus dovon orqali Kondagattu ziyoratgohiga odamlarni olib ketayotgan bo‘lgan. Taxmin qilinishicha, haydovchi yo‘lning murakkab qismida boshqaruvni eplay olmagani oqibatida avtobus ag‘darilib ketgan va jarlikka qulagan.

Voqea joyida qutqaruv ishlari olib borilgan.