Samarqandda qutqaruvchilar yosh bolaning qo‘lini asrab qolishdi

30 oktabr kuni Samarqand viloyat Favqulodda vaziyatlar boshqarmasi navbatchilik qismiga Samarqand shahridagi 10-son mehribonlik uyi tarbiyalanuvchisi, 2006 yilda tug‘ilgan A.Sh.ning chap qo‘li barmog‘iga temir bolt tiqilib qolganligi, uni 8 soatdan buyon chiqara olishmayotganligi haqida xabar kelib tushadi.

Voqea joyiga yetib borgan viloyat FVB Qutqaruv otryadi bolaning barmog‘ida qon aylanish buzilganligi, bolt esa chiqmayotganligiga guvoh bo‘lishadi.

— Bolani zudlik bilan Respublika shoshilinch tibbiy yordam ilmiy markazi Samarqand filialiga olib bordik. Tibbiyot xodimlari yana bir oz vaqt o‘tganida, qon aylanishi buzilgani uchun bolaning barmog‘ini kesishga to‘g‘ri kelishini aytishdi, — deydi FVB xodimi G‘.Ravshanov KUN.UZ muxbiriga.

Shundan keyin tibbiyot xodimlari va qutqaruvchilar hamkorlikda harakat qilib, bolaning barmog‘idagi boltni maxsus vosita bilan avaylab kesib olishgan.