IIV Samarqand akademik litseyi. O‘quvchi nimadan norozi?

«Kun.uz» tahririyatiga Ichki ishlar vazirligi Samarqand akademik litseyi o‘quvchisidan murojaat kelib tushdi.

Unda shunday deyiladi: «Litseyda 800 nafarga yaqin o‘quvchi o‘qiydi. Ammo litsey oshxonasiga 100 kishi sig‘adi xolos. Oshxonada gigiyenik qoidalar unutilgan. Tekshiruvchilar kelganda bular oldindan ogohlantiriladi. Bizga hatto hayvon ham yemaydigan ovqat pishirishadi. Somsa (molning kalla-pochasidan), perashkisi yog‘ga bo‘kib yotadi. O‘qituvchilar va direktorimizga boshqa turdagi ovqatlar pishiriladi. Bizga hatto bir necha kunlik qaylani ham beraverishadi. Men o‘sha ovqatlar tufayli oshqozonimdan qattiq aziyat chekayapman.

Qolaversa, biz IIV Samarqand akademik litseyida o‘qib, haligacha forma bilan ta'minlanganimiz yo‘q. Forma uchun pulni shu yilning iyul oyida yig‘ib berganmiz. Forma faqat 1-kurs o‘quvchilariga berilgan. Tekshiruvchilar kelishganda ular yig‘ilishga chiqishadi. Hammasi ko‘zbo‘yamachilik. Hatto isitish tizimi yo‘q. Xonalar sovuq».

Mazkur murojaat borib o‘rganildi.

Ushbu litseyda 775 nafar o‘quvchi o‘qiydi. Murojaatda aytilganidek, haqiqatan ham litsey oshxonasi 100 o‘ringa mo‘ljallangan.

– Kelgusi yili dastur asosida 200 o‘rinli oshxona quriladi, – deydi litsey direktori Aktam Usmonov. – Ayni vaqtda loyihalash ishlari davom etmoqda.

Ma'lum bo‘lishicha, ayni vaqtda litsey o‘quvchilari o‘z hisoblaridan ovqatlanishadi. Oshxonada nonushta, tushlik va kechki tanovul uchun taomlar tayyorlanadi.

Ammo oshxonadagi sanitariya holatini yaxshi deb bo‘lmaydi. Bosh oshpaz oshxona oxirgi marta qachon davlat sanitariya-epidemiolgiya nazorati markazi tomonidan tekshiruvdan o‘tkazilganini ham aytib bera olmadi.

O‘sha kuni tayyorlanayotgan taomlar tibbiyot xodimi nazoratidan o‘tmagan. Taomlar sifatiga hech kim javob bera olmaydi. Bosh oshpaz bu holatni oshxonaga biriktirilgan hamshira kelmay qolgani bilan izohladi.

Litsey o‘quv xonalari va yotoqxonasidagi isitish tizimiga kelsak, ayni vaqtda bu borada ta'mirlash ishlari olib borilayotganining guvohi bo‘ldik.

Litsey direktorining aytishicha, isitish tizimi 15 noyabrdan yoqiladi. Ammo elektr energiyasidagi uzilishlar isitish tizimida bir qator muammolarni keltirib chiqaradi. Tabiiy gaz yo‘q. Ushbu muammolar yuzasidan Samarqand shahar hokimi F.Rahimovga murojaat qilingan.

Litseyda haqiqatan ham forma masalasi muammo. O‘quvchilardan forma uchun joriy yilning iyul oyida 450 ming so‘mdan pul yig‘ib olingan. Ushbu mablag‘lar bank orqali Toshkentdagi «Ideal business center» MChJ hisob raqamiga o‘tkazib berilgan. Ayni vaqtda faqat 1-bosqich o‘quvchilari forma bilan to‘liq ta'minlangan, xolos.

– Bizga formalarni tayyorlab berishi lozim bo‘lgan korxonaning aybi bilan bu muammo yuzaga keldi, – deydi litsey direktori. – Ular shartnoma shartlarini vaqtida bajarishmayapti. Telefon qo‘ng‘iroqlariga umuman javob bermay qo‘yishdi. Hali o‘quvchilarga qishki kiyimlar ham tayyorlatishimiz lozim.

Aktam Usmonov shunday deb, korxona direktor o‘rinbosariga oldimizda telefon qildi. Bir necha bor urinishlar zoye ketdi. Javob bo‘lmadi. O‘zimiz ham urinib ko‘rdik, ammo korxona mutasaddilari bilan bog‘lanishning iloji bo‘lmadi.

Keyinchalik ushbu holat yuzasidan korxonaning Samarqand viloyati bo‘yicha vakili Abdusodiq Irisovdan izoh oldik.

– Korxonamiz Ichki ishlar vazirligining hududlardagi shu kabi barcha litseylaridan buyurtma olgan, – deydi A.Irisov. – Buyurtma hajmi katta bo‘lgani uchun ham formalarni yetkazib berish kechikmoqda. Qolaversa, forma tayyorlash uchun xomashyo Xitoydan olib kelinadi. Ayni vaqtda xomashyo yetib kelgan. Hozir litseyning 2-bosqich o‘quvchilari uchun yana 50 komplekt forma berildi. Tez kunlarda litsey o‘quvchilarini forma bilan to‘liq ta'minlaymiz. 

Murojaatda keltirilgan vajlar o‘z isbotini topdi. Litsey oshxonasidagi sanitariya holati talab darajasida emas, isitish tizimida ham muammolar bor va o‘quvchilar formasi bo‘yicha ishlar mas'ul korxona aybi bilan paysalga solinmoqda.

«Kun.uz» mas'ul tashkilotlar tomonidan IIV Samarqand akademik litseyidagi ushbu muammolarga tez orada barham berilishiga, masalalar ijobiy yechim topishiga umid bildiradi.

Bardoshbek SAMAD o‘g‘li,  
Kun.uz muxbiri.