«Uy talabga javob bermaydi» - Samarqandliklar «arzon» uylar qimmatlab ketganidan norozi bo‘lmoqda

Shu tarzda endi uy egalarining oyiga 1,5 million so‘mdan, imtiyozli davr tugagach, oyiga 4,5 million so‘mdan to‘lov qilib borishlari kerak.

Video: Youtube

 Video: Mover (tas-ix)

«Masalan, men yolg‘iz onaman, boquvchim yo‘q, ikki farzandim bor, bittasini bog‘chaga berishdan o‘zga ilojim yo‘q. 1 500 000 so‘m uy uchun oylik to‘lov, bolalar bog‘chasi uchun 800 000 to‘lov, yashash ham kerak. O‘zi O‘zbekistonda buncha xarajatlarni ko‘tara oladigan oylik maosh bormi? Nimani o‘ylab arzonlashtirilgan uylar narxini ko‘tarishyapti», deydi «Obod maskan»da yashovchilardan biri.

Aholi norozi bo‘layotgan jihatlardan biri, bugun xususiy tadbirkorlar uy qurish uchun yerni sotib oladi, u yerda joylashgan hovlilarni ham sotib olib, xonadonlarni ko‘chiradi. Xaridor e'tiroz bildirmasligi uchun uy sifatiga ham javob beradi. Bu yerda esa, yer to‘liq davlat tomonidan berilgan. Quruvchi snos uchun boshqa quruvchilar qatori katta mablag‘ sarflamagan. Yana qator imtiyozlar bo‘lgani holda ham aytilganidan tor, ham ayrim xonadonlarda sifatsiz ham deyarli bozor narxi bilan teng «arzon» uy taklif qilmoqda. Shu masala barchani qiynamoqda», – deydi Sh.Boltayeva.

Aholi vakillarining aytishicha, asosan uyga ehtiyojmand oilalar istiqomat qiluvchi bu mahallada dastlab davlatga qarashli bolalar bog‘chasi ish boshlagan, fuqarolar farzandlarini bera boshlagan. Ammo bir-ikki hafta o‘tib bu xususiy bog‘cha va uning narxi bir million so‘mligi ma'lum bo‘lgan. Tabiiyki, shusiz ham oyiga 1 500 000 so‘m uy uchun to‘lov qiladigan oilalar buncha pulga farzandini bog‘chaga bera olmaydi.

O‘ta qimmat xususiy bog‘chaning aynan mana shu hududda qurilishi kimning tashabbusi bilan amalga oshgani noma'lum. Bugungi holat shuki, aksariyat oilalar yoki farzandini qarovsiz qoldirib ishga ketadi yoki er-xotindan biri ishidan voz kechadi. Har holda oladigan oyligi ikki farzandning bog‘cha puliga yetadi yoki yo‘q. Bugun bolalar bog‘chasining bir oylik narxi bir bola uchun 800 000 so‘mga tushirilgan. Ammo oilalarning bunga ham qurbi yetmayapti.

12 iyun kuni aholining qurilish korxonasi vakillari bilan uchrashuvi og‘zaki aytishuvga aylanib ketgach, aholi bilan viloyat, shahar hokimligi, qurilish korxonasi, mana shu qurilishlarning buyurtmachisi bo‘lgan Samarqand viloyat «Shahar qurilish invest» va bank vakillari ishtirokida masalaga oydinlik kiritish rejalashtirilgandi. Ammo belgilangan vaqtda barcha aholi to‘plangani holda biror bir mas'ul tashkilot vakili kelmadi. Savollar esa ochiq qolmoqda.

Gapning indallosi shuki «Obod maskan» mahallasi ahli ikki narsadan qat'iyan norozi: uy narxi oshib ketgani va uylar sifatsiz qurilgani.

Bundan ikki oy oldin ham shu maskandagi 21-uyda yashovchilar tahririyatimizga murojaat qilganida borib, mazkur uy poydevori yorilib ketganiga guvoh bo‘lgandik. Ahvol shu darajada ediki, yoriqdan poydevorning narigi tomoni ko‘rinardi. Andisha qilibmi, fuqarolar o‘shanda holatni yoritmay turishimizni iltimos qilishgandi. Ammo vaqt o‘tib uy qurilishidagi kamchiliklar yuzaga chiqavergani bugun ko‘pchilikni norozi qilmoqda. Endilikda uylardagi muhandis-kommunikatsiya tarmoqlari, eshik va derazalar, devorlardagi kamchiliklar, uy yon-atrofining cho‘kishi ham ko‘pchilikni xavotirga solgan.

Kun.uz voqealar rivojini kuzatib boradi va yuzaga kelgan muammo yuzasidan tegishli idoralardan izoh kutib qoladi.

Anvar MUSTAFOQULOV,
Kun.uz muxbiri.

PS: Joriy yilning 9 iyun kuni saytimiz orqali Samarqandning boshqa bir hududida ham xuddi shunga o‘xshash - «Samarqanddagi «Yoshlar uyi» narxi nega qimmat bo‘lib ketdi — Uy egalari boshqalar uchun ham to‘laydimi?» sarlavhali maqola e'lon qilingan edi. Afsuski, bu yuzasidan hech qanday munosabat bildirilmadi. Aftidan, tegishli idoralar aholining haqli e'tirozlarini sukut saqlab «yengib o‘tmoqchi» shekilli.