McDonald's mijozlarni jalb qilish maqsadida elektrokarlar uchun quvvatlash stansiyalarini ochmoqda

Avval tez ovqatlanish restoranlari mijozlarni bepul Wi-Fi bilan jalb qilgan bo‘lsa, endilikda buning yangi yo‘lini topish vaqti keldi. McDonald's kompaniyasi ushbu sohada birinchi bo‘lib elektrokarlar uchun quvvatlash stansiyalari tarmog‘ini ishga tushirdi. Haydovchi qovurilgan kartoshka va “Big Mak” bilan tamaddi qilayotgan bir vaqtda uning elektrokari quvvat olib turadi.

Hozircha bunday imkoniyat faqat Shvetsiyada mavjud bo‘lib, “Makdonalds” bu davlatdagi 55 ta restoranini quvvatlash stansiyalari bilan jihozladi. Biroq aytish joiz, ushbu xizmat pullik bo‘lib, har bir daqiqa uchun pul hisoblanadi. Bunday stansiyalar tarmog‘ini dastlab Shvetsiyada, so‘ngra Niderlandiyada kengaytirish rejalashtirilgan.