Banklarda jismoniy shaxslar bilan valuta ayirboshlash operatsiyalarini amalga oshirish tartibiga o‘zgartirish kiritiladi

Tijorat banklarida jismoniy shaxslar bilan valuta ayirboshlash operatsiyalarini amalga oshirish tartibi to‘g‘risidagi nizomga o‘zgartirishlar va qo‘shimcha kiritiladi.

Muhokama uchun e'lon qilingan hujjat loyihasiga ko‘ra, shikastlanish belgilari mavjud bo‘lgan muomalaga yaroqli banknotalar bilan valuta operatsiyalarini amalga oshirish, shuningdek, muomalaga yaroqsiz banknotalarni inkassoga qabul qilish tartibi tijorat banklari tomonidan mustaqil ravishda belgilanishi mumkin.

Shuningdek, valuta ayirboshlash shoxobchasida jismoniy shaxslarning shikastlangan banknotalari bilan bog‘liq valuta ayirboshlash operatsiyalari amalga oshirilganda muvofiq shakldagi 09012-son ma'lumotnoma ikki nusxada rasmiylashtiriladi va uning bir nusxasi jismoniy shaxsga beriladi, ikkinchi nusxasi kunlik hujjatlarga tikib qo‘yiladi.

Tijorat banklari tomonidan jismoniy shaxslarning shikastlangan banknotalarini milliy valutaga ayirboshlash yoki shu turdagi shikastlanmagan banknotalarga almashtirish, maydalash, yiriklash hamda konversiya operatsiyalarni amalga oshirishni rad etishga yo‘l qo‘yilmaydi.

Shikastlangan banknotalar bilan bog‘liq valuta ayirboshlash yoki muomalaga yaroqsiz banknotalarni inkassoga qabul qilish operatsiyalari amalga oshirilganda, bunday operatsiyalar 09011-son reyestrga rasmiylashtiriladi.