OCh-2020. Janubiy Koreya finalga chiqdi, O‘zbekiston Olimpiada yo‘llanmasi uchun Avstraliyaga qarshi o‘ynaydi

Osiyo chempionati (U23) yarim finali doirasidagi ikkinchi uchrashuvda Janubiy Koreya olimpiya jamoasi Avstraliyaga qarshi maydonga tushdi.

Yarim final o‘yinning 56-daqiqasida Kim Dae-Von Avstraliya jamoasi darvozasini ishg‘ol etib hisobni ochgan bo‘lsa, 76-daqiqada Li Dong-Gyong ajoyib zarbasi bilan hisobdagi farqni ikkitaga yetkazdi – 2:0.

Natijada Avstraliya ustidan ishonchli g‘alabaga erishgan koreyslar Tokio-2020 yo‘llanmasi bilan birga finalga ham yo‘llanma olishdi. Guruhdoshimiz chempionlik o‘yinida bizni mag‘lub etgan yana bir jamoa – Saudiya Arabistoniga qarshi maydonga tushadi.

Avstraliya olimpiya jamoasi esa Osiyodagi egasi hozircha aniq bo‘lmay turgan yagona Olimpiada yo‘llanmasi uchun kurashda O‘zbekiston olimpiya jamoasiga qarshi maydonga tushadi. 3-o‘rin uchun o‘yin 25 yanvar, shanba kuni o‘tkaziladi. Bahs g‘olibi Tokio-2020ga yo‘l oladi. 

Osiyo chempionati (U23). 
Yarim final. 22 yanvar
Janubiy Koreya – Avstraliya – 2:0
Gol: Kim Dae-Von 56, Li Dong-Gyong 76.

3-o‘rin uchun o‘yin.
25 yanvar (shanba)
O‘zbekiston – Avstraliya

Final. 26 yanvar
Janubiy Koreya – Saudiya Arabistoni.