Avtokran olib kirish uchun 4 milliard so‘m imtiyoz olish rejasi amalga oshmadi

Bojxona to‘lovlarini to‘lamaslik maqsadida xorijiy mamlakatdan olib kelingan texnikalarning ishlab chiqarilgan yilini noto‘g‘ri ko‘rsatishga urinish hamda tovarlarning tashqi iqtisodiy faoliyat tovar nomenklaturasi kodlarini o‘zgartirish kabi navbatdagi qonunbuzarlik holati aniqlandi.

Buxoro viloyati bojxona boshqarmasi Kontrabanda va bojxona qonunchiligi buzilishiga qarshi kurashish bo‘limi xodimlari fuqaro T.A. tomonidan 4 mlrd. 162 mln. 888 ming so‘m imtiyoz asosida olib kirilayotgan avtokran vositasining yorliqlaridagi ma'lumot bilan avtomashinaning holatini tegishli idoralar bilan hamkorlikda ekspertizadan o‘tkazishdi.

Natijada mazkur avtotransport vositasi hujjatlarda ko‘rsatilganidek 2018 yilda emas, balki 2007 yilda ishlab chiqarilgani ma'lum bo‘ldi.

«Yuqoridagi holat yuzasidan bojxona organlari tomonidan surishtiruv harakatlari davom ettirilmoqda», – deyiladi Davlat bojxona qo‘mitasi xabarida.