Xalqaro aeroportlarda qolish koronavirusni yuqtirish xavfini oshiradi – Transport vazirligi

O‘zbekistonda karantin chorasi sifatida barcha xorijiy mamlakatlar bilan transport qatnovini to‘xtatdi. Xorijdagi vatandoshlarni olib kelish bo‘yicha charter reyslar amalga oshirilmoqda.

Biroq ijtimoiy tarmoqlarda o‘zbek fuqarolarining xorijdagi aeroportlarda qolib ketgani, charter reys uchun chiptalar sotuvi bo‘yicha turli xabarlar paydo bo‘lmoqda.

Kun.uz muxbiri charter reyslarga bog‘liq shu va boshqa savollar bilan Transport vazirligi matbuot kotibi Navro‘z Ashurmatovga murojaat qildi.

– Ijtimoiy tarmoqlarda: «Chiptamiz bor edi, biz keta olmadik», degan shikoyatlar bo‘lyapti. Buni vazirlik vakili sifatida qanday izohlaysiz?

– Bu yuzaga kelgan vaziyat fors-major holati hisoblanadi. Bunda aviakompaniyaning qandaydir manfaati yo‘q.

Hozirgi kunda qator xorijiy davlatlarda qolib ketgan fuqarolarni vatanga qaytarish bo‘yicha choralar ko‘rilmoqda. Bugungi kunga kelib, Rossiyaning Moskva va boshqa shaharlar aeroportlarida odamlar to‘planib qolganiga guvoh bo‘lish mumkin. Ayrimlarida chipta bor, ba'zilarida yo‘q. Ularning barchasi birdaniga vatanga qaytishni xohlamoqda. Lekin, buni bitta reys bilan amalga oshirib bo‘lmasligini, imkoni yo‘qligini ular ham to‘g‘ri tushunishlari kerak.

Bugungi kunda hukumat tomonidan imkon qadar O‘zbekistonga qaytish istagini bildirgan fuqarolarni olib kelish choralari ko‘rilmoqda.

Shu o‘rinda, xorijdagi fuqarolarimizga alohida bir murojaat bilan chiqmoqchi edik. Ulardan iltimos qilardikki, agar yashash joyi, boshpanasi bo‘lsa, imkon qadar, aeroportlar kabi odamlar ko‘p to‘planadigan joylarda to‘planib olishmasin. Chunki, natijada, o‘sha hududda koronavirusni yuqtirib olish xavfini orttirmoqda. Bu esa, boshqa muammolarni keltirib chiqaradi.

Shu boisdan, aeroportga to‘planmasdan, barcha elchixona va konsulliklarda koll-markazlar tashkil etilgan, ularga qo‘ng‘iroq qilib, ulardan ma'lumotlarni olib, shunga ko‘ra harakat qilishlarini istardik.

– Charter reys bilan odatdagi reys farqini tushuntirib bering. Chunki, odamlar chiptam bor edi, ammo ucha olmayapman, demoqda. Charter reys alohida shakllantiriladimi yoki mavjud chiptalar bo‘yicha amalga oshiriladimi?

– Hozirgi vaziyatda qo‘lida chiptasi bor fuqarolar ham bir narsani tushunishlari kerak. Charter reys tashkil etilganda, o‘sha hududdagi keksalar, homilador va yosh bolali ayollar, bemorlar birinchi navbatda bortga chiqariladi. So‘ngra, o‘sha yurtda bo‘lib turgan tibbiyot xodimlari, ularga vatanda zarurat paydo bo‘lgani bois, olib kelinadi.

Shundan keyin, chiptasi borlar hamda konsullik ro‘yxatidan o‘tgan fuqarolargina bortga chiqariladi. Ularni vatanga qaytarish choralari ko‘riladi.

– Ko‘pchilik, maxsus charter reyslarda bepul ketamiz, deb tushunmoqda. Charter reyslar uchun puli to‘lanadimi yoki kimlar bepul kela oladi?

– Fuqarolarda shunday bir fikr shakllanmoqdaki, charter reys tekin amalga oshirilishi lozim, degan. Ammo, bu – noto‘g‘ri qarash. Charter reyslari har qanday holatda ham pullik asosda o‘sha reys chiptalarini xarid qilgan yo‘lovchilargina olib kelinadi.

Ma'lum bo‘lishicha, aeroportlarda o‘zbekistonliklarning eng ko‘p to‘planish holatlari Rossiya va Turkiyada kuzatilmoqda. Shu munosabat bilan vatandoshlardan vahimaga tushmasdan, xotirjam holda yashash joylariga qaytishlari hamda o‘zlari bo‘lib turgan mamlakatdagi O‘zbekiston elchixonasi yoki konsulliklariga qo‘ng‘iroq qilib, vaziyatdan boxabar bo‘lib turishlari so‘raladi.

Chunki aynan aeroportda to‘planib olishlari, ularning koronavirusni yuqtirish ehtimolini haddan ortiq ko‘tarib yuboradi.

Qolaversa, chiptalarni qaytarishni istagan fuqarolar ham aynan ish tig‘iz tartibda amalga oshayotgan bir vaqtda chiptani qaytarishni birmuncha qulayroq vaqtga qoldirishlari maqbul bo‘ladi.