Barcha davlat mulki yagona reyestrga kiritiladi

Hujjatning qoidalari davlat mulkini boshqarish, davlat ulushini tadbirkorlik sub'yektlariga berish shartlari samaradorligini oshirishga qaratilgan.
 
Norma’ning yozishicha, qaror bilan ikkita nizom tasdiqlandi:

Davlat mulki obektlarining hisobini yuritish tartibi to‘g‘risidagi nizom;

Chet elda joylashgan davlat mulki obektlarining hisobini yuritish va ularni boshqarish tartibi to‘g‘risidagi nizom.
 
Davlat mulki obektlarini onlayn rejimida yuritish uchun "property.davaktiv.uz" sayti barpo etilmoqda. Unda barcha obektlar, davlat ulushiga ega yuridik shaxslar, davlat avtotransport vositalari, intellektual mulk obektlari, foydalanilmayotgan yer maydonlarining to‘liq va aniq hisobi bo‘ladi.
 
Axborot har uch oyda yangilanadi, bo‘sh turgan obektlar esa joyiga chiqmagan holda va obektma-obekt yurmasdan aniqlanadi.
 
Mamlakatimiz tashqarisida joylashgan davlat mulki obektlari bo‘yicha aniq hisobi, pasporti hamda yagona reyestri yuritiladi. Davlatga tegishli korxonalar, aksiyalar paketi va mulkiy majmualarni sotish xalqaro standartlar talablarini inobatga olgan holda amalga oshirilishi kerak.
 
Ikki oy muddatda Ma'muriy javobgarlik to‘g‘risidagi kodeksga davlat mulki obektlari, shuningdek, chet elda joylashgan davlat mulki obektlari to‘g‘risidagi ma'lumotlarni taqdim etmaganlik uchun rahbarlarning javobgarlik choralarini belgilaydigan o‘zgartirish va qo‘shimchalar kiritiladi.
 
Bir oy muddatda bo‘sh turgan obektlardan samarali foydalanish bo‘yicha namunaviy "yo‘l-xaritasi"ishlab chiqiladi va tasdiqlanadi.
 
Davlat aktivlarini boshqarish agentligi matbuot xizmatining axborotiga ko‘ra, mamlakat hududida joylashgan obektlar bo‘yicha ma'lumotlar Agentlik va uning hududiy organlari so‘roviga binoan har olti oyda taqdim etilgan. Biroq qonunchilikda bunday axborotni taqdim etmaganlik uchun javobgarlik nazarda tutilmagan edi. Shu bilan bir qatorda, hisobotlarni tayyorlash va qog‘oz shaklida viloyatlar markazlariga jo‘natishda qiyinchiliklar mavjud edi.
 
Natijada 7 mingdan ziyod davlat obektlari bo‘yicha axborot taqdim etilmagan, bo‘sh turgan obektlar bo‘yicha ma'lumotlar obektma-obekt yurib yig‘ilgan. Davlat mulki to‘g‘risidagi to‘liq bo‘lmagan axborot va undan foydalanish ustidan yetarlicha nazorat o‘rnatilmaganligi uni noqonuniy begonalashtirish hamda Vazirlar Mahkamasining maxsus qarorisiz kafolat sifatida garovga qo‘yish hollariga olib kelgan.
 
Chet eldagi davlat aktivlari bo‘yicha axborot balansida mulk bo‘lgan tashkilotlar tomonidan taqdim etilgan. Davlat mulkini samarali boshqarish va hisobot topshirish bo‘yicha tartib mavjud emas edi.
 
Hujjat 8.05.2020 yildan kuchga kirdi.