O‘zFA Bioorganik kimyo instituti olimlari tomonidan ishlab chiqilgan dori eng keng tarqalgan viruslar ta'sirini 78,3 foizga susaytirish xususiyatini namoyon qilgan.
9 iyun kuni Innovatsion rivojlanish vazirligi ko‘magida “China–Uzbekistan Medicine Technical Park” texnoparki tomonidan ishlab chiqarilgan 19 500 dona «Rutan» dori vositasi O‘zbekiston Respublikasi Sog‘liqni saqlash vazirligiga beg‘araz taqdim etildi, deb xabar bermoqda Innovatsion rivojlanish vazirligi matbuot xizmati.
Taqdimotda Innovatsion rivojlanish vaziri o‘rinbosari Olimjon To‘ychiyev, Bioorganik kimyo instituti direktori, akademik Shavkat Salixov, Sog‘liqni saqlash vazirligi huzuridagi Sanitariya-epidemiologik osoyishtalik agentligi direktori o‘rinbosari Bahrom Almatov, Farmatsevtika sanoatini rivojlantirish agentligi direktori Sardor Kariyev, O‘zbekiston—Xitoy texnoparkining direktori Sharofiddin Mirzaahmedov va boshqa mutasaddilar ishtirok etdi.
O‘zFA Bioorganik kimyo instituti olimlari yaratgan, grippga qarshi original «Rutan» dori vositasi Xitoy olimlari tomonidan o‘tkazilgan sinovlar natijasida SARS CoV-2 tipidagi gripp virusi ta'sirini 78,3 foizga susaytirish xususiyatini namoyon qilgan.
«Rutan» dori GMP talablariga javob beruvchi Xitoy-O‘zbekiston tibbiy texnoparkida tayyorlangan, 11 ming o‘ram dori koronavirusga qarshi gumanitar yordam sifatida Eronga yuborilib, laboratoriya sinovlaridan ijobiy o‘tgan.
Ma'lumot uchun, Innovatsion rivojlanish vazirligi bilan hamkorlikda ishga tushirilgan O‘zbek-Xitoy ilmiy-texnologik parkiga 20 million dollar miqdorida investitsiya kiritilgan bo‘lib, 300ta ish o‘rni tashkil etilgan. Markazning o‘ziga xosligi - unda ham sharq tabobatining asrlar davomida sinovdan o‘tgan davolash uslublari, ham g‘arb tibbiyotining ilg‘or natijalaridan foydalaniladi.
Bugungi kunga kelib texnoparkda dori preparatlarining 8 xil ko‘rinishdagi (tabletkalar, kapsulalar, suyuq ko‘rinishdagi va boshqa) turlarini ishlab chiqaradigan farmatsevtika zavodi faoliyat yuritmoqda. Zavod yuqori xalqaro standartlarga to‘liq javob beradi va GMP talablariga mosligi bilan ahamiyatga molik.
GMP (Good Manufacturing Practic) – dori vositalari, tibbiyot uskunalari, diagnostika jihozlari, oziq-ovqat mahsulotlari, biologik faol qo‘shimchalarni ishlab chiqarish me'yorlari, qoidalari va ko‘rsatmalarini mujassam etgan xalqaro tizim bo‘lib, ma'lum preparat yaratilganida belgilangan talablarga mos ravishda hamda mazkur preparatni ro‘yxatdan o‘tkazuvchi organning talablari asosida preparat ishlab chiqarilishini ta'minlaydi.
