14:50 / 23.07.2020
39625
Коронавируснинг оғир шаклига чалинганларда қандай аломатлар сақланиб қолиши мумкинлиги ҳақида маълумот берилди

Санитария-эпидемиология назорати давлат инспекцияси бошлиғи Нурмат Отабеков АОКАда ўтказилган брифингда коронавирус инфекциясининг оғир шакли билан касалланган беморлар организмида сақланиб қолиши мумкин бўлган аломатлар ҳақида маълумот берди.

Маълум қилинишича, инфекциясиянинг оғир шакли билан касалланган беморлар организмида тромбоэмболия, тромбоз, ўпка артерияси тромбоэмболияси ёки ўткир коронар етишмовчилик каби полиорган ўзгаришлар юзага келади.

«Бунинг натижасида касалликдан тузалгандан кейин баъзи беморларда ўпка ҳаётий сиғимининг 20-30 фоизга камайиши, альвеолалар деворларида бириктирувчи тўқимани юзага келиши сабабли касалликдан сўнг ўпка фибрози кузатилиши мумкин. Бу эса ҳарсиллаш, сурункали кислород етишмовчилигига олиб келади.

Бундан ташқари, баъзи беморларнинг юрак-қон томир тизимида, буйракларда ва асаб тизимида хам патологик ўзгаришларни келтириб чиқариши мумкин», деди Отабеков.

У брифинг давомида шунингдек, коронавируснинг енгил формасидан тузалган беморларда қолиши мумкин бўлган асоратлар ҳақида ҳам гапирди.

«Турли тасдиқланмаган манбаларда коронавирусдан даволангандан сўнг мия емирилиши, бепуштлик каби асоратлар қолади, деган маълумотлар тарқамоқда. 

Касалликнинг тиббий патогенези билан танишмаган ҳолда бундай гапларни тарқатиш ноўрин. Коронавируснинг енгил шаклини бошдан кечирган беморларда касалликдан тузалгандан кейин деярли асоратлар кузатилмаяпти», деди у.

Мавзу
Коронавирус Ўзбекистонда
15 март куни Ўзбекистонда коронавирусга чалинган илк бемор аниқланди.
Барчаси
Top