08:47 / 15.09.2020
2314
LG бурилувчи механизмга эга икки экранли смартфон тақдим этди

Жанубий Кореянинг LG компанияси иккита дисплейли антиқа смартфон Wing’ни тақдим этди. Эътиборлиси, дисплейлардан бири иккинчисига нисбатан бурилади.  

LG Wing ташқи томондан оддий смартфондан фарқ қилмайди, бироқ унинг асосий 6,8-дюймли OLED-экрани бурилувчи механизм билан жиҳозланган бўлиб, унинг остида 3,9-дюймли экранга эга яна битта дисплей жойлашган. Иккинчи дисплейни қўшимча вазифалар учун қўллашга эҳтиёж туғилганда, асосий экранни 90 даражага буриб ундан фойдаланиш мумкин. Шу тариқа смартфон эгалари асосий экранда суратларни кўришлари мумкин бўлади, бу вақтда иккинчи кичик дисплейда суратларни таҳрир қилиш ускуналари акс этади. Смартфоннинг яна бир қизиқ жиҳати, икки экранли тизим бир вақтнинг ўзида ҳам асосий, ҳам олд камера билан тасвирга олиш имконини беради. 

Смартфоннинг антиқа тузилиши унинг ўлчамларига унча таъсир кўрсатмаган – гаджет замонавий бир экранли смартфонлардан бироз қалинроқ ва оғирроқ чиққан. Компанияда таъкидланишича, экраннинг буриш механизми 200 минг мартагача буришга дош бера олади. 

Қолган жиҳатлар бўйича смартфон замонавий смартфонлар учун хос стандарт кўрсаткичларга эга. Қурилма 5G тармоқларни қўллаб-қувватловчи Qualcomm Snapdragon 765G процессорида ишлайди, 8 Гб тезкор ва 256 Гб ички хотира билан жиҳозланган. Қурилма батареяси сиғими 4000 мА-соатни ташкил қилади, корпуси эса чанг ва намдан ҳимояга эга. Смартфоннинг асосий камераси 64 Мпли бош модул, 13 Мпли ўта кенг бурчакли модул ва бурилган экран ҳолатида тасвирга олиш учун 12 Мпли ўта кенг бурчакли модулга эга. Бундан ташқари, гаджет 32 Мпли сурилиб чиқувчи олд камерага эга.    

Маълум қилинишича, LG Wing дастлаб АҚШда сотувга чиқарилади, бироқ у қачон ва қандай нарх билан савдога чиқарилиши ҳозирча очиқланмаган.  

Таъкидлаш жоиз, LG тарихида бунгача бурилувчи экранли телефонлар бўлган: 10 йилча аввал компания бундай механизмга эга бир нечта қурилмалар ишлаб чиққан. Аммо уларнинг экрани остида иккинчи дисплей эмас, балки клавиатура жойлашган бўлган.

Top