17:11 / 12.01.2021
3776
Тошкент - Сеул йўналиши бўйича навбатдаги авиақатновлар санаси тасдиқланди

Uzbekistan Airways авиакомпанияси Тошкент - Сеул (Инчеон аэропорти) йўналиши бўйича Кореяга кириш учун амалдаги рухсатномага эга бўлган чет эл фуқароларини, шу жумладан Ўзбекистон фуқароларини ташиш имконияти мавжуд бўлган навбатдаги қатновлар санаси тасдиқланганини маълум қилди.

Фото: Kun.uz

Қатновлар 2021 йил 28 январь ва 2021 йил 2 февраль кунлари амалга оширилади, дейилади компания хабарида.

Шу кунларда Тошкент - Сеул йўналиши бўйича амалдаги виза билан хорижий фуқароларни ташиш қуйидаги шартлар асосида амалга оширилади:

амалдаги кириш визасининг мавжудлиги (2020 йил 05.04.гача берилган C турдаги визалар бундан мустасно);

Кореянинг Ўзбекистондаги элчихонаси томонидан тасдиқланган лабораторияларнинг бири томонидан учиш санасидан 72 соатдан ошмаган вақт давомида берилган ПЗР усули билан олинган COVID-19 учун салбий тест натижасининг мавжудлиги.

Маълумотнома Кореянинг Ўзбекистондаги элчихонаси муҳри билан тасдиқланган бўлиши керак.

Билдирилишича, Корея томонидан чекловлар сабабли ўриндиқлар сони чекланган. Ўзбекистон қатновларига рухсат этилган максимал йўловчилар сони - 165 йўловчи.

Шунингдек, кўрсатилган саналарда Тошкентдан Инчеон аэропорти орқали учиб кетадиган транзит йўловчиларни туташ вақти 24 соатдан кам бўлган, Кореянинг Ўзбекистондаги элчихонаси томонидан тасдиқланган ПЗР тест маълумотномаси бўлиши шарти билан учинчи мамлакатларга ташиш имконияти мавжуд.

Сўнгги манзил ёки ундан кейинги транзит мамлакатларига кириш қоидаларига риоя қилиш учун жавобгарлик транзит йўловчилар зиммасига юклатилади.

Бошқа кунлари режалаштирилган қатновлар учун (2021 йил 21 январ, 4 феврал ва 18 феврал) аввалги чекловлар амал қилади, яъни Кореянинг Ўзбекистондаги элчихонаси томонидан тасдиқланган ПЗР тест маълумотномасига эга фақат Корея фуқаролари ва F-5, F-6 визалари бўлган чет эл фуқаролари қатновларга қўйилади. Ушбу қатновларда транзит йўловчиларининг ташуви амалга оширилмайди.

Корея Республикасига келгандан сўнг, барча йўловчилар ПЗР тест топшириши ва яшаш жойида 14 кунлик ўзини ўзи яккалаш режимига риоя қилиши шарт. Ўзини изоляция қилиш жойи бўлмаган йўловчилар ўз ҳисобларидан яшаш даври учун 2,100,000 KRW тўлаб махсус давлат карантин муассасаларида ўзини изоляция қилиши шарт.

Top