10:37 / 19.01.2021
4606
Энди қийноқ жиноятини содир этган шахслар муддатидан илгари озод қилинмаслиги мумкин

Қийноқ ҳолатларини аниқлаш ва уларнинг олдини олиш тизими такомиллаштирилади. Бу ҳақда Ҳаракатлар стратегиясини «Ёшларни қўллаб-қувватлаш ва аҳоли саломатлигини мустаҳкамлаш йили»да амалга оширишга оид давлат дастури лойиҳасида айтилган.

Унга кўра, 2021 йилнинг биринчи чорагида келишув асосида Олий Мажлис палаталари, Инсон ҳуқуқлари бўйича Миллий марказ, Инсон ҳуқуқлари бўйича вакил - омбудсман, Бош прокуратура, Ички ишлар вазирлиги ҳамда тегишли вазирлик ва идоралар қийноқ ҳолатларини аниқлаш ва уларнинг олдини олиш юзасидан норматив-ҳуқуқий ҳужжат лойиҳасини ишлаб чиқади.

Лойиҳада:

  • Олий Мажлис Инсон ҳуқуқлари бўйича вакили (омбудсман) ҳузурида қийноқ ҳолатларини аниқлаш ва уларнинг олдини олиш бўйича жамоатчилик гуруҳларини ташкил этиш, ушбу гуруҳлар фаолиятини оммавий ахборот воситалари орқали кенг ва мунтазам ёритиш;
  • омбудсман томонидан ҳар чоракда жамоатчилик гуруҳлари билан биргаликда тергов изолятори ва жазони ўташ муассасаларига «мониторинг ташрифлари» тизимини йўлга қўйиш;
  • Олий Мажлис Инсон ҳуқуқлари бўйича вакили (омбудсман) ҳузуридаги қийноқ ҳолатларини аниқлаш ва улар олдини олиш бўйича жамоатчилик гуруҳларининг давлат органлари ва мансабдор шахслар билан ўзаро муносабатда бўлиш қоидаларини белгилаш ҳамда улар ўртасида ўзаро ҳамкорликни йўлга қўйиш;
  • ҳаракатланиш эркинлиги чекланган (гауптвахтада ҳибсда сақлаш қўлланилган, маъмурий қамоққа олинган, жиноят ишини юритиш чоғида ушлаб турилган ва қамоққа олинган, озодликдан маҳрум қилиш билан боғлиқ бўлган жазоларга ҳукм қилинган, мажбурий даволаш муассасасига жойлаштирилган) шахсларнинг ягона электрон реестрини юритиш;
  • ҳаракатланиш эркинлиги чекланган шахслар сақланадиган жойларда қийноқнинг олдини олиш бўйича жамоатчилик назоратини амалга ошириш, шу жумладан бундай жойларга ҳар чоракда камида бир марта мониторинг ташрифларини амалга ошириш;
  • қийноқ учун жавобгарлик белгиловчи нормаларни халқаро конвенция талабларига мувофиқлаштириш, шунингдек қийноқ жиноятини содир этган шахсларга нисбатан шартли ҳукм қилиш, жазони ўташ муддатидан илгари шартли озод қилиш институти қўлланилмаслигини белгилаш;
  • Олий Мажлис палаталари ҳар йили Олий Мажлис Инсон ҳуқуқлари бўйича вакили (омбудсман)нинг қийноқларнинг олдини олиш бўйича маърузасини эшитиб бориш тартибини белгилаш назарда тутилади.
Top