Navoiyda ko‘tarma kran qulab tushdi

Dastlabki ma'lumotlarga ko‘ra, kran boshqaruvchisi yengil tan jarohati olib, shifoxonaga yotqizilgan.

Viloyat hokimligi axborot xizmatidan ma'lum qilishlaricha, voqea Yoshlik mahallasida ro‘y bergan. Kran «Shohjaxon shamshiri» MChJ tomonidan ko‘p qavatli uylar qurilishiga jalb etilgan.

Gazeta.uz «Shohjaxon shamshiri» MChJ haqida yagona reyestrdagi ma'lumotlarni keltirdi. Unga ko‘ra, korxona 2018 yil may oyida ro‘yxatga olingan. Asosiy faoliyat yo‘nalishi – yog‘och materiallari, qurilish materiallari va sanitar-texnik uskunalar ulgurji savdosi.

Tashkilotning yagona ta'sischisi va rahbari – Lazizjon Murodullayevich Usmonov.

Bir necha kun oldin Qurilish vazirligi qurilish tashkilotlarining onlayn reytingini ishga tushirgan edi. Reytingdan «Shohjaxon shamshiri» MChJ haqida ma'lumotlar topilmadi.