Qashqadaryoda sug‘urta kompaniyasi  xodimi odamlarga soxta sug‘urta polislarini sotgani aniqlandi

Qashqadaryo Muborak tumanida sug‘urta kompaniyalaridan birida ishlagan shaxs fuqarolarga soxta sug‘urta polislarini taqdim qilinganligi fosh etilgan. Bu haqda Bosh prokuratura huzuridagi iqtisodiy jinoyatlarga qarshi kurashish departamenti ma'lum qilmoqda.

Qayd etilishicha, Bosh prokuratura huzuridagi departamentning Muborak tuman bo‘limi tomonidan «O‘zbekinvest» EISK AJning murojaatiga asosan o‘tkazilgan tergovga qadar tekshiruvda, fuqaro R.P. jamiyatning Muborak tuman bo‘limi anderrayteri vazifasida ishlagan davrida fuqarolarga qalbaki polislar sotgani aniqlangan.

Jumladan, u kompyuterdan foydalangan holda 20 nafar fuqaroga qalbaki sug‘urta polislarini berib, guyoki ularning mol-mulkini sug‘urta qilib, sug‘urta badali sifatida 36,7 mln so‘m undirgan.

Ta'kidlanishicha, mazkur holat yuzasidan R.P.ga nisbatan jinoyat kodeksining 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, hozirda tergov harakatlari o‘tkazilmoqda.