16:59 / 19.04.2021
2982
«Сайловлар бўйича бизга холисона баҳо керак» — Шавкат Мирзиёев ЕХҲТ раиси билан учрашувда

2021 йилнинг 14 апрель куни Ўзбекистонга ташриф буюрган Европада хавфсизлик ва ҳамкорлик ташкилотининг амалдаги раиси, Швеция ташқи ишлар вазири Анн Линде давлат раҳбари Шавкат Мирзиёев билан учрашувда Ўзбекистонда инқилобий ўзгаришлар бўлаётганини қайд этган. Бу ҳақда президент матбуот котиби Шерзод Асадов 19 апрель куни ўтказилган брифингда айтиб ўтди.

Асадовнинг сўзларига кўра, учрашувда Анн Линде хоним Ўзбекистонда амалга оширилаётган ислоҳотларни қўллаб-қувватлашини, улар Швециянинг ЕХҲТдаги раислигининг устувор йўналишларига тўлиқ ҳамоҳанг эканини, сўнгги йилларда мамлакатда инқилобий ўзгаришлар бўлаётгани, Шавкат Мирзиёев ташаббуси туфайли Марказий Осиёда ўзаро ишонч ва яхши қўшничилик муҳити шаклланганини таъкидлаган.

«Президент ЕХҲТнинг Демократик институтлар ва инсон ҳуқуқлари бўйича бюроси ва Парламент ассамблеяси тўлақонли миссиясини бўлажак сайловларни кузатиш учун Ўзбекистонга таклиф этди. «Бу борада бизга холисона баҳо керак», деди давлатимиз раҳбари»,  дея Президентнинг учрашувдаги нутқидан иқтибос келтирди Шерзод Асадов.

Учрашувда Анн Линде хоним билан Ўзбекистон—Швеция муносабатлари ҳам муҳокама қилинган. Шавкат Мирзиёев бу борада улкан салоҳият борлиги, лекин ундан фойдаланилмаётганини айтган. Анн Линде Ўзбекистондаги «темир дафтар», «аёллар» ва «ёшлар» дафтарлари ҳам ижтимоий ривожланишга қаратилган ноёб тажриба эканини, аҳоли учун «ижтимоий лифт» бўлишини қайд этган.

Мавзу
Сайлов-2021
Сайлов қонунчилигига киритилган ўзгартишларга кўра сайловлар октябр ойи учинчи ўн кунлигининг биринчи якшанбасида ўтказилиши белгиланди. 2021 йилги президентлик сайлови 24 октябрга тўғри келмоқда.
Барчаси
Top