21:23 / 26.05.2021
7402
Хитой Вашингтонни коронавирус келиб чиқишини аниқлаш учун АҚШга ЖССТ экспертларини киритишга чақирди

АҚШ коронавирус келиб чиқишини аниқлаш бўйича ўтказилаётган тергов доирасида Хитой каби ЖССТ мутахассисларининг ўз объектларига киришини таъминлаши керак. Бу ҳақда Хитой ташқи ишлар вазирлиги вакили Чжао Лицзян брифингда айтиб ўтди.

Фото: Чжао Лицзян / АР/ТАСС

“Форт-Детрикдаги ҳарбий базани ва АҚШнинг бутун дунёдаги биолабораторияларини иложи борича эртароқ очинг”, деб таклиф қилган Хитой вакили АҚШга.

Лицзян, шунингдек, АҚШни “вирус гўёки лабораториядан чиқиб кетгани каби ёлғон ахборот ва фитналар тарқатишда” айблади. У коронавирус келиб чиқишининг бундай версияларини билдириш ЖССТ ишига беҳурматлик эканини ва пандемияга қарши курашдаги халқаро саъй-ҳаракатларга путур етказиши мумкинлигини айтган.

Жорий йил бошида ЖССТ экспертлари коронавирус келиб чиқишини аниқлаш мақсадида Хитойнинг Уҳан шаҳридаги вирусология институтига ташриф буюришганди. Мутахассислар ташриф натижаларига кўра, вируснинг институт лабораториясидан чиқиб кетган бўлиши мумкинлиги эҳтимоли “жуда озлиги” ҳақидаги хулосага келишган.

Бироқ аввалроқ АҚШ нашри коронавирусга чалиниш бўйича дунёдаги биринчи ҳолат қайд қилингандан бир ой олдин, яъни 2019 йил ноябрда Уҳандаги лабораториянинг бирваракайига 3 ходими оғир касалликка учрагани ва АҚШ разведкаси ушбу маълумотни ўрганаётганини маълум қилган.

АҚШ президенти маслаҳатчиси Энди Славитт коронавирус келиб чиқишининг тагига етиш зарурлигини айтган. “Бизга Хитойдан бу борада мутлақ очиқ-ойдинлик зарур”, деб айтган Славитт.

Top