Dam olish kunlari issiq ob-havo saqlanib qoladi

So‘nggi kunlarda mamlakat hududi bo‘yicha iyul oyi boshi uchun me'yoriy qiymatlardan 4-6 darajaga yuqori bo‘lgan anomal issiq ob-havo kuzatilmoqda. Bu hodisa Eron hududlaridan quruq va issiq havo oqimlarining kirib kelishi bilan bog‘liqdir.

Foto: KUN.UZ

“O‘zgidromet” xabariga ko‘ra, bugun respublikaning aksariyat viloyatlarida quruq va kam bulutli ob-havo kuzatiladi, faqat Andijon, Namangan, Farg‘ona viloyatlarida kunning ikkinchi yarmida, Toshkent viloyatida kechga tomon qisqa muddatli yomg‘ir yog‘ishi, momaqaldiroq bo‘lishi ehtimoli bor. Ba'zi joylarda shamol tezligi 15-20 m/s gacha kuchayishi mumkin.

Dam olish kunlarida esa respublikada issiq va quruq ob-havo sharoiti saqlanib qoladi, havo harorati kechalari 24-27 daraja issiq, kunduz kunlari 38-41 daraja issiq, shimolda, janubda va cho‘l hududlarda ba'zi joylarda 44 daraja issiq atrofida bo‘ladi. Shamolning 15-20 m/s tezlikkacha kuchayishi saqlanib qoladi.

Respublikaning ayrim tog‘li hududlarida konvektiv bulutlilik rivojlanishi oqibatida kunning ikkinchi yarmida momaqaldiroq bilan qisqa muddatli yomg‘ir yog‘ishi ehtimoli bor.