13:41 / 09.09.2021
557
Қаршида ўтган йил қурилиши тўхтатилган флагшток маблағ бўлиши билан тикланиши маълум қилинди

Ўтган йил Қарши шаҳрида улкан байроқ ўрнатиш учун қурилиш ишлари бошланган ва бироз ўтиб тўхтатилганди. Ижтимоий тармоқларда байроқ устунини ўрнатиш ишлари бошлангани ҳақида хабарлар тарқалди. Вилоят ҳокимлиги ахборот хизмати ҳолат юзасидан муносабат билдирди.

Муносабатда маълум қилинишича, вилоят ҳокими ташаббуси билан Амфитеатр ёнидаги байроқ ўрнатиш ишлари тўхтатилиб, унга ажратилган 1,35 миллиард сўм маблағ маблағ Қарши шаҳридаги 136-сонли Қарши шаҳридаги оилавий ётоқхона таъмирланишига йўналтирилган. Мустақиллик байрами арафасида қайта таъмирланган ушбу ётоқхонанинг тантанали очилиши бўлиб ўтган.

Айни пайтда Амфитеатр ёнидаги байроқ ўрнатиш ишлари тўхтатилган бўлиб, мустақиллик байрами арафасида атрофи баннерлар билан ўралган. Икки кун олдин кучли шамол туфайли ушбу баннерларга зарар етган. Ҳозирда бу ерда юқорида айтилганидек қурилиш ишлари эмас, баннерларни тиклаш ва ўрнатиш ишлари кетаётгани аниқланган.

«Маълумот учун, асосли маблағлар ажратилганда ушбу бошланган байроқ ўрнатилиши ишлари давом эттирилади. Яъни Ватанимиз байроғини ўрнатиш ишлари бутунлай тўхтатилди, деган фикрдан йироқмиз», дейилади муносабатда.

Эслатиб ўтамиз, 2020 йилда Қарши шаҳрида улкан байроқ ўрнатиш ишлари бошланганди. Ўшанда улкан байроқ учун 1,35 миллиард сўм сарфланиши жамоатчилик томонидан танқидий қарши олинган. Шундан сўнг вилоят ҳокими Зойир Мирзаев 1,35 миллиард сўмга байроқ ўрнатилмаслигини, бу маблағ Қарши шаҳридаги хароба аҳволда бўлган 136-сонли оилавий ётоқхонани таъмирлаш учун сарфланишини маълум қилганди.

Top