09:34 / 10.09.2021
1130
Шаҳрисабзда мактаб ҳовлисидаги 13 туп дарахт директор томонидан кесиб ташланди

Қашқадарё вилояти Шаҳрисабз туманида жойлашган мактаб ҳудудида ўсиб турган 13 туп дарахт директор томонидан кесиб олинган. Бу ҳақда вилоят Экология ва атроф-муҳитни муҳофаза қилиш бошқармаси хабар бермоқда.

Маълум қилинишича, жорий йил 6 сентябрь куни Қашқадарё вилояти Экология ва атроф-муҳитни муҳофаза қилиш бошқармасига Шаҳрисабз туман «Ҳисор» МФЙда жойлашган 49-мактаб филиалида дарахт кесилгани тўғрисида мурожаат келиб тушган. Ушбу мурожаат Шаҳрисабз туман назорат инспекцияси инспекторлари томонидан ўрганилган.

Ўрганиш давомида 49-мактаб филиали ҳудудида 13 туп турли хил ўлчамдаги терак дарахтлари директор томонидан кесилгани аниқланган. Бу хатти-ҳаракати билан мактаб директори «Ўсимлик дунёсини муҳофаза қилиш ва ундан фойдаланиш тўғрисида»ги қонуннинг 4, 6, 37-моддаси талаблари, «Табиатни муҳофаза қилиш тўғрисида»ги қонуннинг 5, 6, 17-моддаси 3-қисми ҳамда 41, 47, 49, 50-моддалари талабларини қўпол тарзда бузган.

Қайд этилишича, ҳолат юзасидан 49-мактаб директорига нисбатан Маъмурий жавобгарлик тўғрисидаги кодекснинг 79-моддаси 1-қисми билан маъмурий баённома расмийлаштирилган. Табиатга етказилган зарар миқдори 13 миллион 338 минг сўм ҳисобланган ҳамда 2 миллион 700 минг сўм жарима қўлланган.

Top