Alisher Qodirov o‘zbek tilini keng qo‘llaniladigan, zamonaviy taraqqiyotga uyg‘un tilga aylantirishga va'da berdi

«O‘zbek tili keng qo‘llaniladigan, zamonaviy taraqqiyotga uyg‘un tilga aylanishi uchun huquqiy asoslar kuchaytiriladi.

 Bunda:

• O‘zbek tilida ish yuritadigan boshqa millatli fuqarolar maoshiga 25 foizgacha ustama to‘lanadi;
• Sohaga aloqador ilmiy adabiyotlardan birini o‘zbek tiliga tarjima qilish ilmiy unvon olishning sharti sifatida kiritiladi;

O‘zbek tilini bepul o‘rgatish kurslari uchun subsidiyalar ajratiladi», – deyiladi nomzod saylovoldi dasturidagi «Ijtimoiy adolat, qadriyatlarga hurmat va fuqaro erkinliklarini ta'minlash sohasida» nomli bandda.

Alisher Qodirov saylovoldi dasturidagi ushbu bandda milliy urf-odat, an'analar, shakllangan qadriyatlarga hurmatsizlik uchun javobgarlik joriy qilishini ham ma'lum qilgan.

Unga ko‘ra, O‘zbekiston Konstitutsiyasi milliy urf-odatlar, an'ana va xalqimizda shakllangan qadriyatlarga nisbatan hurmatsizlik uchun ma'muriy javobgarlikka doir normalar bilan to‘ldiriladi.

Nomzodga ko‘ra, u prezidentlikka kelgan taqdirda «Islom dini — ma'rifat manbai» davlat dasturi qabul qilinadi, shuningdek, mamlakatda so‘z erkinligi va jamiyatni demokratlashtirish ham izchil davom ettiriladi.

• «Islomiy ta'lim muassasalariga qabul kvotalari oshiriladi;
• Qur'on kurslari ommalashtiriladi;
• Dinshunoslik sohasidagi ilmiy ishlar rag‘batlantiriladi;
• OAVlar qo‘shimcha qiymat solig‘idan to‘laligicha ozod qilinadi.

50 ming ovoz jamlagan murojaat bo‘yicha prezidentning OAVda shaxsan munosabat bildirishiga oid tizim yaratiladi», – deyiladi jumladan Qodirovning saylovoldi dasturida.