Germaniyaning DAAD dasturi, u beradigan imkoniyatlar – Simon Kretschmer bilan suhbat

Uzbek.life portaliga yoshlar va talabalar orasidan turli mazmundagi savollar bilan murojaat qiluvchilar soni ortib bormoqda. Bular orasida Germaniyaning nufuzli DAAD akademik almashinuv dasturi haqidagi so‘rovlar ham talaygina. Biz yoshlarning talab va istaklaridan kelib chiqib Germaniyaning Toshketdagi elchixonasi DAAD akademik almashinuv dasturining lektori Simon Krechmer bilan intervyu o‘tkazdik.

Ta'lim sohasida Germaniya va O‘zbekiston o‘rtasidagi hamkorlik 

Hozirgi kunda ta'lim sohasida “PASCH” degan tarmoq mavjud, ya'ni hamkor maktablar tarmog‘i. Bundan tashqari, Gyote instituti ham o‘z faoliyatini olib boradi. Oliy ta'lim sohasiga keladigan bo‘lsak, bizda oliy ta'lim muassasalari doirasida keng hamkorlik yo‘lga qo‘yilgan. Misol uchun DAAD akademik almashinuv dasturi. 

DAAD dasturi bu – chet ellik talabalar uchun magistratura va PhD darajasi bo‘yicha grantlar taqdim etadi. Eslatib o‘tmoqchimanki, hozir DAADning barcha dasturlari bo‘yicha hujjat qabuli davom etmoqda. 

Dastur Germaniyada bir oy davomida nemis tilini o‘rganish kursi, 2 yillik magistratura va PhD darajasi bo‘yicha stipendiyalarni taqdim etadi. DAAD dasturida ishtirok etish shartlari esa qaysi bir loyihada ishtirok etishingizga bog‘liq. Agar magistratura yo‘nalishi haqida aytadigan bo‘lsam, unda Germaniya oliy tashkilotlari talab qiladigan hujjatlar kerak bo‘ladi. Masalan, siz muayyan universitetni tanlagansiz va u yerda o‘qishni boshlashdan avval O‘zbekistonning o‘zida barcha talablarni bajarishingiz kerak. Shundagina keyingi o‘quv yilining o‘zida siz Germaniyada o‘qishni boshlashingiz mumkin. 

Asosiy talablar nimalardan iborat: 

1. Nemis tili yoki ingliz tilidan bilimingiz darajasi; 
2. Bakalavrni tugatganingiz;
3. Bakalavr diplomi baholari ilovasi.

Bundan tashqari nega aynan o‘sha universitetda o‘qishni istayotganingiz ifodalangan xat yozishingiz kerak. Bakalavrni eng yaxshi baholarga bitirgan talabagina stipendiya egasiga aylanishi mumkin.

DAAD dasturi doirasida beriladigan imtiyozlar

Dastur doirasida magistratura va PhD bo‘yicha Germaniyaga kelgan talaba, moliyaviy tomondan to‘laqonli ta'minlanadi. Bundan maqsad talaba, qanday qilib pul topishni o‘ylamasdan fikru xayoli o‘qishga qaratilgan bo‘lishidir. 

Bundan tashqari PhDuchun kelganlar “tarmoq” bilan tanishadilar ya'ni ilmiy ishlari uchun kerakli bo‘ladigan barcha narsalarni stipendiya doirasida olishlari mumkin. Lekin shuni aytib o‘tish joizki, talaba DAADdan stipendiya ola turib, yana boshqa Germaniyadagi stipendiya beruvchi jamg‘armalarga ariza topshira olmaydi. Lekin agar sipendiya ikkita turli davlatga tegishli bo‘lsa, talaba bemalol ikkita stipendiyadan ham foydalanishi mumkin.

To‘liq videoni UzbekLife’ning YouTube’dagi kanalidi tomosha qiling.

Malika Xolxo‘jayeva suhbatlashdi