Qoʻshimcha funksionallar
-
Tungi ko‘rinish
Germaniyada Tomahawk ishlab chiqarilishi mumkin
Germaniya AQShning Tomahawk qanotli raketalari hamda Patriot havo mudofaa tizimlari uchun mo‘ljallangan raketalarni o‘z hududida ishlab chiqarish imkoniyatini qo‘lga kiritish maqsadida Vashington bilan muzokaralar olib bormoqda. Bu haqda Financial Times gazetasi manbalariga tayanib xabar berdi.
Nashr ma’lumotiga ko‘ra, Berlin Yevropa mudofaa salohiyatidagi bo‘shliqlarni qisqartirish hamda AQSh prezidenti Donald Trampning qit’a xavfsizligini ta’minlashga bo‘lgan qiziqishini saqlab qolishni ko‘zlamoqda.
Manbalarning ta’kidlashicha, Germaniya NATOning kelasi hafta Anqarada bo‘lib o‘tadigan sammitiga qadar AQSh bilan qo‘shma ishlab chiqarish bo‘yicha kelishuvga erishishni istamoqda.
Financial Times suhbatlashgan manbalardan biriga ko‘ra, Germaniya va AQSh sanoat vakillari ishtirokida qo‘shma ishlab chiqarish konsepsiyalari muhokama qilinmoqda. Boshqa manbaning aytishicha, muzokaralar ikki mamlakat mudofaa qobiliyatini mustahkamlashga xizmat qiladigan deyarli barcha yo‘nalishlarni qamrab olgan.
Xususan, Germaniya hududida uzoq masofaga uchuvchi Tomahawk qanotli raketalari hamda Patriot zenit-raketa majmualari uchun mo‘ljallangan eng so‘nggi PAC-3 raketalarini birgalikda ishlab chiqarish masalasi ko‘rib chiqilmoqda.
Nashrning yana bir suhbatdoshi AQSh ma’muriyati hamda Amerika mudofaa sanoati vakillari ushbu takliflarga kutilganidan ko‘ra ijobiy munosabat bildirganini qayd etgan.
Shu bilan birga, Germaniya kansleri Fridrix Mers va mamlakat mudofaa vaziri Boris Pistorius AQSh bilan mudofaa sohasida muzokaralar olib borilayotganini tasdiqladi. Biroq ular muhokamalar mazmuni yuzasidan qo‘shimcha ma’lumot bermadi.
Boris Pistoriusning aytishicha, Germaniya AQSh mudofaa sanoati bilan yaqin hamkorlikni davom ettirish niyatida. U mamlakat yaqin besh-o‘n yil ichida juda zarur bo‘ladigan ayrim zamonaviy mudofaa tizimlariga hali ega emasligini tan oldi.
Uning ta’kidlashicha, Germaniya ayrim qurol tizimlari yoki ularning tarkibiy qismlarini mamlakatning o‘zida ishlab chiqarishdan manfaatdor. Bu orqali Berlin Amerika bilan strategik hamkorlikni saqlagan holda, o‘zining mudofaa mustaqilligini kuchaytirishni maqsad qilgan.
Kansler Fridrix Mers ham Berlindagi matbuot anjumanida AQSh bilan mudofaa texnologiyalari sohasidagi hamkorlik jadal sur’atlarda davom etayotganini bildirdi. Uning so‘zlariga ko‘ra, bunday hamkorlik har ikki davlat manfaatlariga javob beradi.
Avvalroq bir qator ommaviy axborot vositalari Germaniyaning Tomahawk raketalarini xarid qilishga urinayotgani va Vashingtonda bu masala yuzasidan muayyan xavotirlar mavjudligi haqida xabar bergan edi.
