Toshkentda profilaktika inspektori kanalda cho‘kayotgan fuqaroni qutqarib qoldi

30 sentyabr kuni soat taxminan 21:30larda 37 yoshli M.M. mast holatda bo‘la turib, ehtiyotsizlik oqibatida Sergeli tumani «Qorasuv» mahallasi hududida oqadigan kanalga tushib ketgan. 

Suvdan mustaqil chiqa olmagan fuqaro atrofdagilarni yordamga chaqirgan. Shu vaqtda o‘sha hududdan o‘tib ketayotgan Sergeli tumani IIO FMB 3-son IIB profilaktika inspektori, leytenant Alibek Maxmarayimov chaqiriqni eshitib yordamga kelgan. 

Suvda cho‘kayotgan kishini ko‘rgach, xodim fuqaroga suvdan chiqishda yordamlashgan. Leytenant A. Maxmarayimov voqea joyiga «tez yordam» chaqirgan va fuqaroga birinchi tibbiy yordam ko‘rsatilgan.

“Hurmatli hamshaharlar va Toshkent mehmonlari, suv havzalari yaqinida ehtiyot bo‘ling”, deyiladi ma'lumotda.