Toliblar qamoqxonalarda harbiylarni ushlab turishda ayblandi

Afg‘onistonda hokimiyatni egallagan “Tolibon” jangarilari mamlakat qamoqxonalarida harbiylarni ushlab turibdi. Bu haqda Afg‘onistonning sobiq vitse-prezidenti Amrulloh Solih Twitter’da ma'lum qildi.

Siyosatchi toliblar qamoqxonalarda IShID jangarilarini ushlab turgani haqida yolg‘on gapirayotganini aytgan. Uning ta'kidlashicha, qamoqxonalarda Afg‘oniston milliy mudofaa va xavfsizlik kuchlari harbiylari saqlanmoqda. Solih toliblar hamon qamoqxonalarga jurnalistlarga tashrif buyurishga ruxsat bermaganini ta'kidlab o‘tgan.

Avvalroq “Afg‘oniston milliy qarshilik fronti” vakili Ali Maysam Nazariy toliblar IShID va “Al-Qoida” terrorchilari bilan yaqin aloqalarni saqlayotganini aytgan. Uning aytishicha, toliblar xalqaro terrorchilik bilan chambarchas bog‘langan bo‘lib, ular har kuni ushbu terrorchi guruhlar a'zolariga yordam ko‘rsatmoqda.