Ekoqo‘m 25 ming 784 gektar yer maydonini yaroqsiz holatga keltirgan tashkilotlar nomini ochiqladi

Kun.uz muxbiri xabariga ko‘ra, tadbirda qo‘mita raisi o‘rinbosari Islombek Boqijonov O‘zbekistonda ekin maydonlari sho‘rlanishi va bu jarayonda kimyoviy o‘g‘itlarni kamaytirishning o‘rni borasidagi savolga ham javob berdi.

«Gerbitsid, pestitsid va mineral o‘g‘itlar. Ularning aksariyati bizga import sifatida kirib keladi. Avvalroq kimyoviy o‘g‘itlarning importi nazorati «O‘zagrokimyohimoya» AJda edi. Hozirda tugatilgan bu tashkilotning respublikada 13ta kimyoviy poligoni bor. Biz endilikda o‘sha poligonlarni qaror bilan o‘zimizga olyapmiz.

Bundan tashqari, avvallari respublikaga olib kiriladigan barcha kimyoviy o‘g‘itlarni nazorat qilish bo‘yicha alohida komissiya ishlardi. Biz bu komissiyaga ham a'zo bo‘ldik. Endilikda kimyoviy moddalarning O‘zbekistonga kirib kelishi, ishlatilishi va ishlatilgach, uning idish, chiqindi va yorliqlari qayerga topshirilishigacha nazoratda bo‘ladi.

Biz aytyapmizki, bu kabi mahsulotlarning idishlari utilizatsiya qilinishi kerak», – dedi u.

Boqijonovning qo‘shimcha qilishicha, hozir O‘zbekistonda 25 ming 784 gektar buzilgan yer maydoni bor.

«Bu «O‘zsanoatqurilishmateriallari» uyushmasi, Avtomobil yo‘llari va Geologiya qo‘mitasi, Issiqlik elektr stansiyalari, «O‘zbekneftgaz» va «Lukoyl» kabi kompaniyalar hisobidan chiqib kelyapti. Bular nimadir ish qiladiki, yerni buzadi.

Biz bu maydonlarga qayta ishlov berishni ularning o‘ziga topshirganmiz.

Bu borada ular oxirgi to‘rt yilda 6 ming 459 gektar yer maydonini bizga qayta ishlov bergan holda qaytarishi kerak. Bu bo‘yicha ishlayapmiz», – dedi qo‘mita raisi o‘rinbosari.