Sherobodda mashinaning suyagini sindiradigan yo‘lchuqur tuzatildi

Kun.uz saytida Surxondaryo viloyatining Sherobod tumanidan o‘tuvchi 4R-103 avtomobil yo‘lidagi nosozliklar haqida tanqidiy maqola e’lon qilingan edi. Surxondaryo yo‘lsozlari bu muammoni bartaraf etish bo‘yicha tezkorlik bilan amaliy choralar ko‘rgani ma’lum qilindi.

“Mazkur avtomobil yo‘lining lavhada qayd qilingan qismida harakat xavfsizligini va uzluksizligini ta’minlash choralari ko‘rildi hamda videolavhada ko‘rsatilgan kamchiliklar bartaraf etildi”, – deyiladi Surxondaryo viloyati avtomobil yo‘llari hududiy boshqarmasi matbuot xizmati xabarida.

Shu o‘rinda ta’kidlashni istardikki, nafaqat Surxondaryo, balki barcha viloyatlar va Qoraqalpog‘iston respublikasi avtomobil yo‘llari hududiy boshqarmalari o‘zlariga tegishli yo‘llardagi nosozliklar bo‘yicha tanqidiy lavhani kutmasdanoq, yo‘llardagi harakat xavfsizligiga bevosita raxna soladigan nosozliklarni ta’mirlash, joriy ta’mirlash choralarini ko‘rishsa, o‘z vazifalarini sidqidildan ado qilishgan bo‘lar edi.