08:25 / 03.03.2022
730
Хоразмда муаммоли кредитлар миқдори 1 трлн сўмдан ошди

Энг катта қарздорлик Урганч шаҳри, Тупроққалъа, Хонқа, Боғот ва Урганч туманлари ҳиссасига тўғри келади. Муаммоли кредитларни сўндириш бўйича чора-тадбирлар белгиланди.

Фото: Kun.uz

Хоразм вилояти ҳокимининг биринчи ўринбосари Қудрат Игамбергенов халқ депутатлари вилоят Кенгашида муаммоли кредитларни график асосида кескин камайтириш чораларини кўриш бўйича ҳисобот берди.

Унда қайд қилинишича, 2022 йилнинг 1 январь ҳолатига муаммоли кредитлар миқдори 903,5 млрд сўмга етган. Уларни йил якунига қадар сўндириш режа-графиги ишлаб чиқилиб, тасдиқланган.

1 февраль ҳолатига 44 млрд сўмлик муаммоли кредитлар сўндирилган.

Жумладан,

  • ҳудудий инвестиция дастурлари доирасида 17 млрд сўм;
  • уй-жой мулкдорлари ширкатларининг 1 млрд сўми;
  • оилавий тадбиркорликни ривожлантириш дастурлари доирасида 4 млрд сўм;
  • бошқа йўналишларда 22 млрд сўмлик муаммоли кредитлар сўндирилган.

1 февраль ҳолатига муаммоли кредитлар ҳажми 1,0 трлн сўмдан ошган. Энг катта қарздорлик Урганч шаҳри, Урганч тумани, Тупроққалъа, Хонқа ва Боғот туманлари ҳиссасига тўғри келади.

Банклар кесимида Ўзмиллийбанк (27,2 фоиз), Ўзсаноатқурилишбанк (13,7 фоиз), Асакабанк (22 фоиз) ва Халқбанки (17,4 фоиз) ҳиссаси юқори бўлиб қолмоқда.

Халқ депутатлари вилоят Кенгаши қарорига кўра муаммоли кредитларни сўндириш бўйича қуйидаги чоралар белгилаб олинди:

  • муаммоли кредити 50 млн сўмдан юқори бўлган йирик мижозларнинг рўйхатини шакллантириб, қарздорликни белгиланган муддатда сўндириш;
  • сўндириш имкони бўлмаган кредит қарздорлигини суд тартибида ундириш;
  • мақсадсиз ишлатилган ҳолатлар юзасидан «қора рўйхат» шакллантириш ва ушбу кредитларни сўндириш бўйича тегишли чоралар кўриш.
Мавзуга оид
Top